కొత్త నీలి గౌను

1909 లో వసంత ఋతువు క్లీవ్ లాండ్ నగరానికి వచ్చేటప్పటికి, అది ఏమాత్రం గేట్స్ అవెన్యును మార్చలేదు. గేట్స్ అవెన్యు దగ్గరలో వున్న వీధుల్లో నివసించే వాళ్ళు మాత్రం ఇళ్ళకు రంగులు వేసుకుని, ఇంటి చుట్టూ అందమైనతోట పెంచుకున్నారు. గేట్స్అవెన్యు మాత్రం ఎప్పటిలాగే మురికిగా,అసహ్యంగా ఉండిపోయింది. గేట్స్ అవెన్యు ఒక చిన్న వీధి, అయితే మురికిగా వుండడం వలన అది పొడుగ్గా కనపడుతుంది. అక్కడ నివసించే కుటుంబాలన్నీ పేదవి. వాళ్ళ దగ్గర డబ్బులుండేవి కావు. వాళ్లకు అధికంగా సంపాదించాలని కోరిక వుండేది కాదు. వాళ్ళెవరూ చాలా ఏళ్లుగా వాళ్ళ ఇళ్ళకు రంగులు కూడా వేసుకోలేదు. అంతే కాదు వాళ్లకు నీటి సౌకర్యం కూడా వుండేది కాదు. ఆ వీధి మొత్తం ఎంతో మురికిగా వుండేది . ఆ వీధిలో నడిచేందుకు సరైన దారి లేదు, వీధి దీపాలు లేవు. గేట్స్ అవెన్యు వీధి చివర రైలు పట్టాలు వుండడం వలన ఎక్కువ శబ్దాలు, దుమ్ము, ధూళి వచ్చి ఆ వీధిని మరింత మురికి చేసేవి .

గేట్స్ అవెన్యు దగ్గరలో వుండే స్కూల్ లో చదివే అమ్మాయిలంతా కొత్తవి, అందమైన గౌన్లు వేసుకున్నారు. కానీ గేట్స్ అవెన్యు నుండి వచ్చే చిట్టి మాత్రం అదే చినిగి పోయిన, చలికాలంలో వేసుకున్న పాతదైన గౌనే వేసుకుని స్కూలుకు వచ్చింది. బహుశ ఆ అమ్మాయికి అదొక్క గౌనే ఉందేమో! చిట్టి టీచర్ కు చాలా అసంతృప్తి కలిగింది. నిజానికి చిట్టి ఎంతో ముద్దుగా వుంటుంది.అంతే కాక ఎంతో కష్టపడి చదువుతుంది, అందరితో ఎంతో స్నేహంగా, సభ్యతగా వుంటుంది. కానీ చిట్టి ముఖం సరిగ్గా కడుక్కోదు.ఆమె జుట్టు శుభ్రంగా వుంచుకోదు. ఎవరు చిట్టిని చూసినా బురదలోని తామరపూవులా వుంది అనుకుంటారు.

ఒక రోజు టీచర్ చిట్టితో అంది " రేపు స్కూల్ కు వచ్చే ముందు ముఖం కడుక్కుని రావా ...! ప్లీజ్ నాకోసం అది చేయవా ! ప్లీజ్ నా కోసం. "

మరుసటిరోజు చిట్టి ముఖం, జుట్టు శుభ్రంగా వున్నాయి. చిట్టి ఇంటికెళ్ళే ముందు టీచర్ అంది " బంగారు తల్లీ ఇప్పుడు మీ అమ్మను రేపు నీ గౌనును వుతకమని చెప్పు . "

కానీ చిట్టి మళ్ళీ అదే మురికి గౌనుతో బడికి వచ్చింది.'బహుశ వాళ్ళమ్మకు చిట్టి మీద ఏమీ ఆసక్తి లేదేమో!అనుకుంది టీచర్. అందుకే ఒక అందమైన నీలిరంగు గౌను కొనుక్కొచ్చి చిట్టికి ఇచ్చింది. చిట్టి టీచర్ ఇచ్చిన బహుమతిని తీసుకుని ఆనందంగా, ఆత్రుతగా ఇంటికి పరిగెత్తింది .

మరుసటి రోజు అమ్మాయి కొత్త నీలి రంగు గౌను వేసుకుని, ఎంతో శుభ్రంగా , చక్కగా తయారయి స్కూల్ కు వచ్చింది. అమ్మాయి టీచర్ తో అంది: " ఈ ఉదయం మా అమ్మ కొత్త నీలి రంగు గౌను లో నన్ను చూసి తన కళ్ళను తానే నమ్మలేకపోయింది, మా నాన్న ఇంట్లో లేరు, కానీ రాత్రి భోజనానికి వస్తారు అప్పుడు నన్ను కొత్త నీలి గౌనులో చూస్తారు ."


ఆ రోజు చిట్టి అమ్మాయి చాలా వుత్సాహంగా ఉంది. వాళ్ళ నాన్న అమ్మాయిని కొత్త నీలి గౌనులో చూసి తన కింత అందమైన అమ్మాయి ఉందా అని ఆశ్చర్యపోయాడు. కుటుంబం అంతా భోజనానికి కూర్చున్నాక వంటగదిలో టేబిలు పైనున్న టేబిల్ క్లాత్ ను చూసి అతనింకా ఆశ్చర్యపోయాడు. వాళ్ళింట్లో ఇంతవరకు టేబిల్ క్లాత్ లాంటివి వాడడం అతను చూడలేదు.

"మనమిప్పటి నుండి పరిశుభ్రంగా ఉండాలి" అతని భార్య, భర్తతో అంది " నాకు సిగ్గుగా ఉంది మన అమ్మాయి ఇంత శుభ్రంగా ఉంటే మనం ఇంత మురికిగా ఉండడం. "

భోజనాలయ్యాక చిట్టి తల్లి వంట గది అంతా శుభ్రం చేస్తూ ఉండగా కొన్ని నిముషాల సేపు ఆమె భర్త ఆమె చేస్తున్నదంతా మౌనంగా చూశాడు. తర్వాత బయటికి వెళ్లి ఇంటి కంచెను బాగు చేయడం మొదలు పెట్టాడు. మరుసటి రోజు కుటుంబం సహాయంతో చిట్టి నాన్న ఇంటి ముందు మంచి తోట తయారు చేయడం మొదలెట్టాడు.ఆ వారం అంతా చిట్టి పక్కింటతను వీళ్ళు చేసేదంతా గమనించాడు.వారం చివర్లో పక్కింటతను పదేళ్ల తర్వాత తన ఇంటికి రంగులేశాడు. కొద్దీ రోజుల తర్వాత యువకుడైన ఒక చర్చ్ మినిష్టర్ గేట్స్ అవెన్యూ లోని ఆ రెండు ఇళ్ల ముందుగా వెళుతూ ఆ ఇద్దరు పని చేసేది చూశాడు . మొట్టమొదటి సారిగా ఆ వీధికి నడిచే దారి లేదని, వీధి దీపాలు లేవని, కుళాయి నీళ్లు లేవని గ్రహించాడు. "ఇళ్లను పరిశుభ్రంగా పెట్టుకోవడానికి శ్రమించే వాళ్లకు సహాయం చేయాలి" అనుకున్నాడు చర్చ్ మినిష్టర్ . వెంటనే ఆ ఊర్లోని కొంతమంది ప్రముఖుల్ని వాళ్లకు సహాయం చేయవలసిందిగా కోరారు. కొద్దీ నెలల తర్వాత యువకుడైన ఆ చర్చ్ మినిష్టర్ కారణంగా గేట్స్ అవెన్యూకు నడిచేదారి వచ్చింది, వీధి దీపాలు వచ్చాయి, అన్ని ఇళ్లకు కుళాయి నీళ్లు కూడా వచ్చాయి. చిట్టి కొత్త గౌను వేసుకున్న ఆరు నెలల తర్వాత గేట్స్ అవెన్యూ గౌరవనీయులైన ప్రజలు నివసించే ఒక పరిశుభ్రమైన వీధిగా మారిపోయింది .

మిగతా ప్రాంతపు ప్రజలు గేట్స్ అవెన్యూ కథ విన్న తర్వాత వాళ్ళు కూడా పారిశుధ్య కార్యక్రమాలు మొదలు పెట్టారు. 1913 నుండి ఏడువేల చిన్న పట్టణాలు, పెద్ద నగరాలు దీన్ని ఉద్యమంగా తీసుకుని ఇళ్లకు రంగులువేయ్యటం, ఇళ్లను మరమ్మత్తు చేయడం, ఇళ్లను మంచి నివాసయోగ్యoగా చేయడం ద్వారా ఆ ఇళ్ళలో నివసించే వాళ్లకు మంచి జీవితం అందినట్లయింది.

ఎవరు ఊహించారు ఒక టీచర్ ఒక చిట్టికి కొత్త నీలి గౌను ఇచ్చినప్పుడు ఏం జరుగుతుందో !



మూలం : అజ్ఞాత రచయిత అమెరికన్ కథ “ న్యూ బ్లు డ్రెస్”

అనువాదం : డాక్టర్ పేరం ఇందిరా దేవి , ప్రచురణ: విపుల, డిశంబర్, 2016